Stefán Jón neitar

Stefán Jón Hafstein neitar því alfarið að það hafi verið rætt formlega innan raða Samfylkingarinnar að bjóða fram undir merkjum R-Listans, án Vinstri-grænna og Framsóknarflokksins. Össur Skarphéðinsson segir Stefán hafa setið við hlið sér á fundi Samfylkingarinnar í Reykjavík þegar þetta var rætt og góður rómur gerður að. Össur Skarphéðinsson hefur undanfarið margítrekað að Samfylkingin ætti að bjóða fram undir merkjum R-listans ein og sér með óháðum, ef ekki næst samstaða með Vinstri grænum og Framsóknarflokki. Í Íslandi í dag í gær gekk Össur lengra og sagði að þetta hefði verið rætt á fundum Samfylkingarinnar við góðar undirtektir. Hann sagði þennan möguleika hafa verið í umræðu m.a. innan Samfylkingar töluvert lengi. Á forsíðu fréttabréfs Samfylkingarinnar í lok síðasta árs hafi verið greint frá þessum hugmyndum og þar einnig komið fram að gerður hafi verið góður rómur að hugmyndunum. Stefán Jón Hafstein kannast ekkert við að þetta hafi verið rætt formlega innan raða Samfylkingarinnar og því síður að hann hafi lýst sig hlynntan þessu. Í samtali við fréttastofu sagði hann að allt tal í þessa veru hefði verið á algjörlega óformlegum nótum. Einn maður hefði sagt á fundi Samfylkingarinnar að þó að einhver segði sig úr R listanum væri ekki þar með sagt að hann væri dauður. Annað væri það ekki. Þegar fréttastofan bar þetta undir Össur í dag sagðist hann standa við ummæli sín og sagði bæði Stefán Jón og Steinunni Valdísi borgarstjóra hafa setið fundinn og fylgst vel með því sem þar hafi farið fram. Það hafi verið rætt innan raða Samfylkingarinnar að bjóða fram undir merkjum R Listans þó að samstarfið við Vinstri Græna og Framsóknarflokkinn færi út um þúfur og margir lýst stuðningi við þær hugmyndir. Ekki náðist í Steinunni Valdísi Óskarsdóttur, borgarstjóra, fyrir fréttir.