Óánægja með ráðningu skólastjórans

Mikil óánægja virðist vera með ráðningu Fríðu Regínu Höskuldsdóttir sem skólastjóra Landakotsskóla hjá hluta foreldra og hópi kennara í skólanum. Fullyrða þeir að skólastjórinn sé ekki hlutlaus eins og lofað hafði verið. Einn af fimm stjórnarmönnum greiddi ekki atkvæði með ráðningu hennar. Einn kennaranna í kennararáðinu umdeilda starfaði áður undir Fríðu í Mýrarhúsaskóla og hætti þar í mótmælaskyni þegar Fríða hélt ekki skólastjórastarfinu eftir sameiningu Mýrarhúsa- og Valhúsaskóla. Aðeins þrír umsækjendur voru um stöðuna, en tveir af fimm upphaflegum umsækjendum drógu umsóknir sínar til baka. Annar hinna umsækjendanna á barn í skólanum og hinn er kennari við skólann. Fríða tengdist skólanum ekki með beinum hætti. Fulltrúar ósáttra foreldra hafa farið fram á það að fá að funda með fræðslumálayfirvöldum í Reykjavík vegna málsins. Þá vilja þeir funda sem fyrst með Fríðu Regínu og ætla að taka frekari ákvarðanir um framhaldið í kjölfar þess.