Yfirheyrður vegna sölu vændislista

Maður, sem er grunaður um að hafa selt lista með nöfnum fimm vændiskvenna á Netinu  var yfirheyrður af lögreglunni í Kópavogi í gær. Maðurinn  er grunaður um að hafa selt listann í gegnum heimasíðurnar private.is og einkamal.is á sex þúsund krónur. Hann er einnig grunaður um að hafa fengið sextán ára gamla stúlku til að taka við greiðslum frá mönnum sem keyptu vændislistann, til að hylja slóð sína. Í fréttum Stöðvar 2 á föstudag kom fram að maðurinn hafi hitt stúlkuna fyrir utan heimili hennar til að taka við greiðslum sem borist höfðu inn á hennar reikning frá fólki sem keypti vændislistann. Stúlkan hefur verið yfirheyrð af lögreglunni í Kópavogi. Að sögn Friðriks Smára Björgvinssonar yfirlögregluþjóns í Kópavogi er verið að skoða hvernig rannsókninni verður haldið áfram. Aðspurður hvort lögreglan hyggðist ræða við vændiskonurnar sem eru á listanum sagði Friðrik ekki hafa verið tekna ákvörðun um það. Hann sagði einnig að ekki hefði verið ákveðið hvort einkamálavefirnir private.is og einkamal.is verði skoðaðir. Hann gat heldur engu svarað um það hvort maðurinn hafi játað að hafa selt vændislistana. Maðurinn væri engu að síður grunaður um að hafa brotið gegn 206. grein hegningarlaganna þar sem segir að hver sem stuðli að því með ginningu, hvatningu eða milligöngu að aðrir hafi holdlegt samræði eða önnur kynferðismök gegn greiðslu, eða gerir sér lauslæti annarra að tekjulind, svo sem með útleigu húsnæðis eða öðru skuli sæta fangelsi allt að fjórum árum.