Brosað í gegnum tárin

Vigdís Finnbogadóttir, fyrrverandi forseti, sagði Flateyringum að þeir ættu vináttu sína, þegar hún flutti ávarp á minningarfundi um þá sem fórust í snjóflóðinu fyrir tíu árum. Íbúar bæjarins gátu ekki haldið aftur af tárunum, þegar björgunarsveitarmenn og sjóliðar Landhelgisgæslunnar, komu til fundarins.

Það var einmitt svona sem þyrla landhelgisgæslunnar kom fljúgandi út úr sortanum, eftir snjóflóðið á Flateyri. Allt annað flug til Vestfjarða lá þá niðri, vegna veðurs. Og þrátt fyrir haugasjó var varðskipi og bátum siglt á fullri ferð, til Flateyrar, með björgunarmenn sem lögðu nótt við dag við að grafa fólk upp úr rústum húsa sinna.

Gærdagurinn var því tilfinningaþrunginn hjá Flateyringum, þegar þeir minntust þeirra tuttugu bæjarbúa sem fórust í snjóflóðinu. Engu að síður gengu þeir til verka sinna eins og venjulega, eftir stutta minningarathöfn í kirkjunni, um morguninn.

Vigdís Finnbogadóttir, fyrrverandi forseti, var eini gesturinn sem bæjarbúar buðu til fundarins. Í erindi sínu rifjaði hún upp þegar hún heyrði fyrst fréttirnar af náttúruhamförunum.