Vill að ríkisvaldið bregðist við vanda sjávarútvegsfyrirtækja

Ef gengi íslensku krónunnar stendur í stað eða hækkar getur það leitt til þess að sjávarútvegsfyrirtæki þurfi að hætta starfsemi. Afkoma sjávarútvegsfyrirtækja hefur versnað verulega undanfarna mánuði vegna sterkrar stöðu krónunnar en Björgólfur Jóhannsson, formaður Landssambands íslenskra útvegsmanna, vill að ríkisvaldið bregðist við.

Björgólfur segir það alveg ljóst að hátt gengi íslensku krónunnar hafa gríðarlega áhrif á fyrirtæki sem hafa sínar tekjur nánast alfarið í erlendri mynt. Hann segir að erfiðar aðstæður mæti nú útvegsmönnum. Hátt gengi krónunnar er aðalumræðuefni aðalfundar LÍÚ sem hófst klukkan eitt í dag.

Björgólfur bendir á það að frá miðju ári hafi krónan styrkst mikið og afkoma útvegsfyrirtækja hafi versnað verulega í kjölfarið. Hann segir að ef krónan standi í stað eða hækki geti það haft gríðarleg áhrif á sjávarútveginn. Fyrirtækin geti lent í taprekstri ef krónunum fækki sem þau fá fyrir framleiðsluna. Það geti endað með því að þau loki með tilheyrandi áhrifum fyrir starfsfólk og viðskiptavini.

Útgerðarmenn telja krónuna ekki rétt skráða og vilja að ríkisvaldið bregðist við þeim aðstæðum sem nú blasa við. Björgólfur segist ímynda sér að það séu ýmsar ráðstafanir sem hægt sé að grípa til nú þegar sem myndu laga stöðuna, minnka þensluna í samfélaginu og bæta afkomu fyrirtækjanna.