Fjöldi barnaverndartilfella tvöfaldast á átta árum

Börnum, sem njóta þjónustu barnaverndarkerfisins, líður jafn illa eða jafnvel verr en börnum innan geðheilbrigðiskerfisins. Stúlkum líður verr en drengjum. Fjöldi barna undir eftirliti barnaverndaryfirvalda hefur ríflega tvöfaldast á átta árum. 

Börnin voru um 2000 talsins á ári fyrir tíu árum og eru nú yfir 5000 á ári. Þetta gildir um börn á aldrinum þrettán til átján ára og má búast við að hækkun á sjálfræðisaldrinum úr sextán í átján ár árið 1998 hafi þarna einhver áhrif. En þó að börnunum hafi fjölgað verulega hefur starfsmönnum barnaverndarkerfisins lítið sem ekkert fjölgað og fjárveitingar til barnaverndarmála hafa ekki aukist svo neinu nemi.

Halldór Sigurður Guðmundsson félagsráðgjafi hefur gert könnun á hegðun og líðan barnanna. Hann segir að börnunum líði illa og að þau hegði sér illa. Þau standi erfiðlega námslega og hafi skerta færni miðað við önnur íslensk börn á sama aldri. Ástand barna á þessum aldri sé svipað og jafnvel verra en barna innan geðheilbrigðiskerfisins. Stúlkur sem njóta þjónustu barnaverndarinnar eru færri en strákarnir en þeim líður samt verr en drengjunum. Þær finni meira til depurðar, kvíða og líkamlegrar vanlíðanar en drengir.

Séu börnin sjálf spurð meta þau vandann sem minni en aðrir, til dæmis foreldrar og kennarar. Börnum, sem búa úti á landi og njóta barnaverndar þar, líður verr en börnunum á höfuðborgarsvæðinu. Börnum innan barnaverndarinnar hér á landi líður með svipuðum hætti og börnum í Ósló í Noregi. Halldór Sigurður segir að það gefi ekki endilega vísbendingu um að minni samfélög gefi börnunum meira öryggi.

Hann segir að niðurstöður rannsóknar sinnar sýni aö skoða þurfi álagið á fjölskyldur sem eiga börn sem þurfa aðstoð barnaverndar og skoða þá sérstaklega tekjur fjölskyldnanna, atvinnuþátttöku og það hvernig barnavernd, geðheilbrigðiskerfið, skólarnir og heilsugæslan vinna saman að málefnum þessara barna.