Þið fáið ekki stig fyrir hana

Þorsteinn Gunnarsson skrifar í dag Utan vallar pistil um væntingar til íslenska landsliðsins í knattspyrnu sem mætir því ítalska í vináttulandsleik á Ítalíu í dag. Við urðum næstum því heimsmeistarar 18. ágúst síðastliðinn. Við sigruðum þrefalda heimsmeistara Ítalíu á Laugardalsvelli 2-0. Fyrsti leikur snillingsins Marcello Lippi með stjörnum prýtt ítalskt landslið tapaðist. Aðsóknarmetið var slegið. Þvílík stemmning, magnaður leikur, þvílík frammistaða hjá íslenska liðinu í logni og sól á Laugardalsvelli. „Úrslitin skiptu engu máli, þetta var bara æfingaleikur," sagði Lippi og kveikti sér í vindli og tók lífinu með stóískri ró. Íslenska þjóðin var hins vegar að fara á límingunum. Nú lá leiðin á HM 2006 í Þýskalandi. HM-riðillinn var draumi líkastur, kannski einhver smá Svíagrýla í gangi. Malta, jú bara grín. Búlgaría og Ungverjaland, geta þessar þjóðir nokkuð? Króatar, jú þeir geta ekkert á útivelli. „Ég er vanur því að tapa fyrsta leiknum með nýju liði," sagði Lippi eftir leikinn á Laugardalsvellinum og kveikti sér í öðrum vindli. Logi og Ásgeir reyndu að berja skýjaborgirnar niður á Íslandi. Formaðurinn náði að slá vallarmetið. Hvaða lið var aftur næst á dagskrá? Er ekki reksturinn í góðu lagi? Væntingavísitalan var komin í botn. En svo kom að alvörunni. Það var á tali hjá Búlgaríu. Það reyndist ekki nóg að kaupa búlgarska símann. Það gleymdist að gera ráð fyrir þessum Berbatov, sögðu sérfræðingarnir. Var hann ekki markakóngur í Þýskalandi? Næst var það Ungverjaland. Þá var markvörðurinn okkar ekki í stuði. Malta var algjört kex. Svíagrýlan snarversnaði. Engir æfingaleikir fengust í mars, engin þarfagreining. Og nú síðast Króatía. Ný taktík, sami mannskapur, sama niðurstaða. Það er líka hægt að skora úr aukaspyrnum. Eitt stig, fimm leikir. Við vorum ekki næstum því heimsmeistarar lengur. Nema kannski miðað við höfðatölu. „Alvaran byrjar í næsta leik, þá hefst undankeppni HM," sagði Lippi og drap í rettunni undir stúkunni í Laugardal. Enginn Þorgrímur Þráinsson sjáanlegur. Lippi keypti sér hlutabréf í vindlapökkunarverksmiðju, byggði upp landsliðið í rólegheitum og er nú á leiðinni á HM, búinn að vinna fjóra leiki en tapa einum. „Góð frammistaða hjá Íslendingum í kvöld, þið fáið bara ekki stig fyrir hana," sagði Lippi á fallegu sumarkvöldi í Reykjavík og glotti og bætti við: „Bara fyrir alvöru landsleik."