Renault með besta liðið

Giancarlo Fisichella, ökumaður Renault-liðsins í Formúlu 1 kappakstrinum, segir litlu máli skipta að Ferrari muni frumreyna bíl sinn í næstu keppni sem fram fer í Bahrain um næstu helgi. Ferrariliðið hyggst nota nýja bílinn, F2005, tveimur keppnum á undan áætlun. "Það þýðir að liðið sé sannfært um sigur. Renault er samt með sterkasta liðið," sagði Fisichella en hann vann fyrstu keppni tímabilsins sem fram fór í Ástralíu og félagi hans, Fernando Alonso, bar sigur úr býtum í Malasíukappakstrinum. Fisichella sagði Alonso vera skæðasta andstæðing sinn. "Að sama skapi er hann besti samherji sem ég hef haft. Samband mitt við hann er fullkomið, við grínumst mikið við hvorn annan. Núna verðum við að einbeita okkur að þróun bílsins og sjá hvort við eigum ekki fullt erindi í slaginn um heimsmeistaratitilinn."