Íraskir súnní-arabar fylkja liði

Súnní-arabar í Írak ákváðu í gær að stofna pólitísk og trúarleg samtök sem ætlað er að vera málsvari þeirra sem minnihlutahóps í landinu. Ákvörðunin þykir áfangi að því að fá súnní-araba, sem voru kjarninn að baki ríkisstjórnar Saddams, til liðs við aðra þjóðfélagshópa við að móta nýtt Írak. Súnní-arabar sniðgengu að miklu leyti fyrstu lýðræðislegu þingkosningarnar sem haldnar voru í landinu í janúar og eiga því fáa fulltrúa í stjórn landsins. Ákvörðunin um stofnun nýrra samtaka var tekin á samkomu um eitt þúsund fulltrúa ættbálka súnní-araba, stjórnmálaflokka og trúarhreyfinga í Bagdad nú um helgina. Á þinginu var samþykkt ályktun þar sem krafist var afsagnar innanríkisráðherrans, sem er sjía-múslimi, en súnníar væna liðsmenn öryggissveita innanríkisráðuneytisins um að eiga aðild að morðum á súnní-klerkum. Í mótmælaskyni við morðin voru moskur súnnía víða um Írak lokaðar um helgina.