Vígi þýskra krata gæti fallið

Úrslit héraðsþingkosninga sem fara fram í dag í Nordrhein-Westfalen, einu hinna sextán sambandslanda Þýskalands og því fjölmennasta, þykja líkleg til að verða forboði þess hver örlög ríkisstjórnar Gerhards Schröder kanslara verða er næst verður kosið til Sambandsþingsins að rúmu ári. Jafnaðarmannaflokkur Schröders hefur haldið um héraðsstjórnartaumana í Nordrhein-Westfalen - sem nær meðal annars yfir Ruhr-dalinn - síðan árið 1966. En óánægja með gerðir ríkisstjórnar Schröders hefur hrakið marga kjósendur frá stuðningi við jafnaðarmenn og því hefur Peer Steinbrück, sem farið hefur fyrir héraðsstjórninni undanfarið kjörtímabil, átt á brattann að sækja í kosningabaráttunni, þrátt fyrir persónulegar vinsældir. Síðustu mánuðina hafa kristilegir demókratar, undir forystu Jürgens Rüttger, mælst í skoðanakönnunum með mjög afgerandi forskot. En í þessu rótgróna vígi krata virtist á endaspretti kosningabaráttunnar sem allnokkur hluti óákveðinna kjósenda ætlaði að snúast aftur á sveif með jafnaðarmönnum og skoðanakannanaspekingar sögðu að af þessum völdum mætti búast við því að mjög mjótt yrði á mununum, að því er fram kemur á fréttavef Der Spiegel.