Nýliðarnir mætast í 1. umferð

Nýliðarnir í úrvalsdeildinni í körfubolta, Höttur og Þór Akureyri munu mætast í 1. umferð Íslandsmótsins í haust en KKÍ kynnti leikjaniðurröðun í dag. Íslandsmeistarar Keflavíkur hefja titilvörn sína í Seljaskóla gegn ÍR-ingum. Aðrir leikir í 1. umferð eru: Fjölnir-KR, Grindavík-Haukar, Njarðvík-Skallagrímur og Snæfell-Hamar/Selfoss. Nýliðar Breiðabliks í 1. deild kvenna mæta Njarðvík á útivelli í 1. umferð, á meðan Íslandsmeistarar Keflavíkur leika gegn ÍS í Kennaraháskólanum. Þá leika bikarmeistarar Hauka gegn Grindavík. Í 1. deild karla fara nýliðarnir í Hrafnaflóka til Víkur og mæta þar Drangi í 1. umferð í byrjun október. Reynir mætir Breiðablik í Smáranum og fyrsti leikur Tindastóls í 1. deild eftir 17 ár í úrvalsdeild verður gegn Stjörnunni á Króknum. KFÍ sem einnig féll úr úrvalsdeildinni mætir ÍS í 1. umferð og Þór Þorlákshöfn leikur heima gegn Val.