Of blint fyrir blindflug

Kvöldfluginu frá Reykjavík til Egilsstaða síðasta sunnudag var snúið við skammt frá áfangastað vegna þoku sem myndaðist við upphaf hitabylgjunnar sem þá reið yfir. Vélin lenti aftur í Reykjavík um klukkan 10 um kvöldið og farþegunum 48 var svo komið á áfangastað með morgunfluginu daginn eftir. Egilsstaðaflugvöllur er hins vegar alþjóðaflugvöllur, búinn fullkomnum tæknibúnaði til blindflugs. "Þegar búnaðurinn er hvað fullkomnastur, líkt og hér í Reykjavík og á Egilsstöðum, eru tiltekin lágmörk sem miðað er við. Á endanum verður flugmaðurinn jú að sjá brautina," segir Heimir Már Pétursson, upplýsingafulltrúi Flugmálastjórnar. "Það er ekki hægt að vera í blindflugi alveg þar til maður snertir braut."