Sjálfráða og með kosningarétt

Útvarpsstöðin Bylgjan FM 98,9 fagnar 18 ára afmæli í dag. Bylgjan var fyrsta einkarekna útvarpsstöðin á Íslandi og hóf útsendingar 28. ágúst 1986. Bylgjan fagnar því 18 ára afmæli í dag og einnig því að vera stærsta útvarpsstöð landsins en í könnun Gallup í júní mældist Bylgjan í fyrsta sinn með meiri hlustun en Rás 2. "Þetta eru sannarlega tímamót og mikið fagnaðarefni. Við höfum lengi verið á toppnum hjá okkar markhópi, karla og kvenna á aldrinum 25 til 49 ára. Nú hins vegar mælumst við vinsælasta útvarpsstöð landsins meðal Íslendinga á aldrinum 12 til 80 ára," segir Bjarni Arason dagskrárstjóri Bylgjunnar. Útvarpssvið Íslenska útvarpsfélagsins rekur nú Bylgjuna. Margt gott fólk hefur stýrt Bylgjunni í gegnum tíðina og skemmt landanum með tónlist, spjalli og traustum fréttum í 18 ár. Þegar stöðin fór í loftið 18. ágúst 1986 var Einar Sigurðsson útvarpsstjóri og Páll Þorsteinsson dagskrárstjóri. Bjarni Arason núverandi dagskrárstjóri segir starfsfólk Bylgjunnar hlakka til að njóta afmælisdagsins með hlustendum sínum. "Það má segja að stöðin sé nú orðin sjálfráða og komin með kosningarétt. Auðvitað bjóðum við hlustendum upp á afmælisköku í tilefni dagsins. Við verðum með beina útsendingu frá Iceland Spa & Fitness í Dalsmára í Kópavogi sem áður hét Sporthúsið en nú er verið að sameina rekstur líkamsræktarstöðvarnar Baðhúsið, Sporthúsið og Þrekhúsið undir einu félagi, Iceland Spa & Fitness. Við hefjum útsendingu frá Sporthúsinu klukkan 11 en kakan sem Kornið hefur bakað í tilefni dagsins verður skorin klukkan 12. Við höfum líka látið klippa til lag í tilefni dagsins, Átján rauðar rósir sem Vormenn Íslands sungu svo eftirminnilega um árið. Inn í það hefur verið blandað gullkornum frá fjölmörgum sem komið hafa við sögu á Bylgjunni frá upphafi. Svo auðvitað rifjum við upp nokkra af þeim smellum sem hafa verið vinsælir í gegnum tíðina," segir Bjarni Arason dagskrárstjóri Bylgjunnar.