Blair boðið á pönktónleika

Meðlimir íslensku pönkhljómsveitarinnar Tony Blair fagna komu bresku forsætisráðherrafrúarinnar, Cherie Booth Blair, hingað til lands og lýsa sérstakri ánægju með Rannsóknarstofu í kvennafræðum sem bjóða henni hingað á málþingið Konur, völd og lögin sem fram fer í Háskólabíói í dag. "Cherie Blair er glæsileg fyrirmynd ungra stúlkna og sönnun þess hversu langt konur geta náð ef þær hafa vit á að giftast merkum mönnum. Við erum hæstánægðir með þetta framtak að flytja hér inn fræga maka, það er mikil nýbreytni. Cherie er nú komin í hóp merkra maka stjórnmálaleiðtoga og hennar mun væntanlega vera getið í framtíðinni í sömu andrá og Nancy Reagan, Barbara Bush og Denis Thatcher," segir Páll Hilmarsson, meðlimur bandsins. Svo skemmtilega vil til að hljómsveitin Tony Blair, sem notið hefur nokkurra vinsælda fyrir lagið "Alltaf hlýtt á Hlemmi", hefur nýverið samið lagið "Cherie Blair" og telur sveitin það líklegt til að slá í gegn. "Við vorum búnir að semja þetta lag áður en við fréttum af komu hennar til landsins en það væri okkur sönn ánægja að fá að flytja lagið Charie Blair og jafnvel fleiri fyrir forsætisráðherrafrúna og helstu forsprakka Rannsóknarstofu í kvennafræðum. Pönkhljómsveitin er reiðubúin að skipuleggja einkatónleika í æfingahúsnæði sínu. Við sendum Rannsóknarstofunni skeyti með þessari ósk okkar en þeir tóku ekki vel í málið. Við fengum þau svör að lítið pláss væri á dagskrá Cherie til einkatónleika." Páll segist ekki útiloka að hljómsveitin reyni að spila fyrir frúna opinberlega. Tony Blair skipa bræðurnir Páll og Hilmar Hilmarssynir, Haraldur Ingi Þorleifsson og Guðmundur Björnsson og segja þeir ástæður nafngiftarinnar í samræmi við hefð pönkhljómsveita að velja sér stuðandi og á köflum ósmekkleg heiti. "Þannig hafa nöfn blóðþyrstra harðstjóra og stríðsglæpamanna löngum þótt henta vel sem hljómsveitarheiti."