Enn eitt jafnteflið hjá KR-ingum

Íslandsmeistarar KR færast fjær því að verja titilinn með hverjum leik. Í gærkvöld komu Keflvíkingar í heimsókn og andlausir KR-ingar náðu aðeins jafntefli gegn varnarsinnuðum Suðurnesjamönnum. Leikurinn var átakanlega illa leikinn nánast frá upphafi og til enda. Keflvíkingar voru klárlega komnir til þess að sækja stig í Vesturbæinn og þeir þurftu engin kraftaverk til þess að halda því. Leikurinn byrjaði reyndar með látum því Arnar Jón Sigurgeirsson komst einn í gegnum vörn Keflavíkur strax á 2. mínútu en Ólafur Gottskálksson varði skot Arnars Jóns laglega. Eftir það hrundi leikurinn gjörsamlega og það var ekkert að gerast þegar boltinn datt óvænt fyrir fætur Hólmars Arnar Rúnarssonar eftir hornspyrnu. Hólmar þakkaði pent fyrir sig með því að þruma boltanum í netið. Arnar Jón var aftur á ferðinni á 26. mínútu þegar hann lagði upp gott færi fyrir Sigurvin Ólafsson en skalli Sigurvins fór rétt yfir. Þeir félagar endurtóku leikinn sex mínútum fyrir hlé en í það skiptið fékk Sigurvin boltann í fæturnar og hann var ekki í miklum vandræðum með að koma honum yfir marklínuna hjá Keflavík. Seinni hálfleikur var í einu orði sagt sorglegur. Keflvíkingar lágu í skotgröfunum og máttlausir og andlausir KR-ingar gerðu veikar tilraunir til þess að skora en án nokkurs árangurs. Leikurinn opnaðist örlítið síðustu tíu mínúturnar þar sem bæði lið fengu ágætis færi sem þeim tókst ekki að nýta. Það besta fékk Kristinn Hafliðason KR-ingur er hann komst einn í gegn en það var táknrænt fyrir leik KR-inga að hann skyldi detta á afturendann áður en hann kom skoti á markið. 1–1 jafntefli því niðurstaðan sem verða að teljast sanngjörn úrslit. Nýliðarnir frá Keflavík fögnuðu stiginu og geta vel unað við sitt. Þeir eru að berjast fyrir lífi sínu og í þeirra augum er eitt stig á KR-velli sigur. Það var ekki að sjá á meisturunum að þeir vildu sigra þennan leik. Baráttan og viljinn var enginn, spilið tilviljanakennt og marklaust svo ekki sé dýpra tekið í árinni. Eins og staðan er í dag eru þeir algjört miðlungslið og staða þeirra í deildinni er engin tilviljun. Þeir eru bara ekki betri en þetta í dag. KR-Keflavík 1-1 0–1 Hólmar örn Rúnarsson 14. 1–1 Sigurvin Ólafsson 39. Dómarinn Egill Már Markússon Mjög góður Bestur á vellinum Sigurvin Ólafsson KR Tölfræðin Skot (á mark)  11–11 (4–5) Horn 3–4 Aukaspyrnur fengnar 10–21 Rangstöður 4–2 Góðir Sigurvin Ólafsson KR Arnar Jón Sigurgeirsson KR Petr Podzemsky KR Hólmar Örn Rúnarsson Keflavík Ólafur Ívar Jónsson Keflavík