Jákvætt í garð lækna og lögreglu

Yfir 80 prósent þjóðarinnar eru jákvæð í garð lækna, lögreglu og kennara. Þingmennska virðist þó ekki vera til vinsælda fallin, því innan við þriðjungur þjóðarinnar er jákvæður gagnvart alþingismönnum. Þetta kemur fram í Þjóðarpúlsi Gallup þar sem fólk var spurt hvort það væri jákvætt eða neikvætt í garð nokkurra starfstétta. Flestir eru jákvæðir gagnvart læknum eða um 85 prósent aðspurðra. Nokkur munur er þó eftir tekjum fólks, en þeir sem eru með 550 þúsund krónur eða hærri mánaðarlegar fjölskyldutekjur er jákvæðara gagnvart læknum en fólk með lægri tekjur. Um 81 prósent er jákvætt gagnvart kennurum. Konur eru þó mun jákvæðari en karlar, eða um 85 prósent kvenna á móti um 77 prósentum karla. Eins er munur á viðhorfi til kennara eftir menntun fólks. 67 prósent þeirra sem hafa lokið grunnskólaprófi eru jákvæðir á móti 88 prósentum háskólamenntaðra. Lögreglan er líka vinsæl en 81 prósent aðspurðra eru jákvæðir í hennar garð. Því eldra sem fólk er, því jákvæðara er það og aftur líta konurnar starfsstéttina jákvæðari augum. Þá fellur prestastéttin í kramið, en 79 prósent eru ánægð með þá starfstétt. Konur og eldra fólk er ánægðast með prestana. Jákvæðnin fer dvínandi þegar fólk er spurt um viðhorf þess til fjölmiðlafólks. 62 prósent þjóðarinnar lýsa yfir jákvæðu viðhorfi. Ef viðhorf til stéttarinnar er skoðað eftir því hvað fólk segist ætla að kjósa, kemur í ljós að kjósendur Sjálfstæðisflokksins eru síður jákvæðir í garð fjölmiðlafólks en kjósendur annarra flokka. Lögfræðingarnir skora enn lægra á viðhorfsskalanum, en 52 prósent eru jákvæðir gagnvart þeim. Enn sem fyrr er munur á viðhorfum kynjanna, þar sem konurnar eru jákvæðari. Þá eru mun fleiri stuðningsmenn stjórnarflokka en stjórnarandstöðu jákvæðir. Fæstir eru þó jákvæðir gagnvart alþingismönnum, af þeim starfsstéttum sem spurt var um. Athyglivert í ljósi þess að þetta er sama fólkið og kýs þá til starfa, og þess að á þing komast mun færri en vilja. Um 30 prósent þjóðarinnar eru jákvæð en um 42 prósent neikvæð gagnvart þingmönnum. Ekki er marktækur munur eftir bakgrunni fólks en lítilsháttar munur er á viðhorfi eftir aldri í þá veru að eldra fólk er jákvæðara.