Sörenstam kona ársins

Kylfingurinn Annika Sörenstam hlaut nafnbótina Íþróttakona ársins af bandarískum samtökum sem hafa það að markmiði að stuðla að aukinni þáttöku kvenna í íþróttum. Er hún vel að nafnbótinni komin, enda hefur árið verið henni gott sem sést hvað best á því að hún braut nýlega í fyrsta sinn tveggja milljóna króna múrinn fyrir það verðlaunafé sem henni hefur áskotnast á árinu. Fyrir utan verðlaunaféð tryggði hún sér stað í sögubókum bandarísku kvennamótaraðarinnar þegar hún komst í hóp örfárra kylfinga sem unnið hafa fimm mót eða fleiri fjögur ár í röð. Einnig þarf að minnast þátttöku hennar á karlamótaröðinni þegar hún varð fyrsti kvenkylfingurinn til að takast á við karlana. Reið hún ekki feitum hesti frá þeim viðureignum en stóð sig ekki illa og sýndi að kvenfólkið getur þegar best lætur velgt körlunum undir uggum.