Aukin aðsókn í kvennaathvarf

Töluverð fjölgun er á dvalardögum í kvennaathvarfinu það sem af er árinu þó nokkuð rólegt hafi verið yfir athvarfinu í júní. Dvalardagar kvenna eru orðnir 575 og barna 367. Alls eru því dvalardagar kvenna og barna 942 á fyrri helmingi ársins. Þarna er um töluverða fjölgun að ræða á milli ára því dagar barna og kvenna í dvöl á síðasta ári numu 1501 degi allt árið. 44 konur með 33 börn hafa komið til dvalar í kvennaathvarfinu það sem af er árinu. Um fjórar konur í athvarfinu hverju sinni með um tvö til þrjú börn. Ekki er þó hægt að draga algildar alhæfingar út frá þessum tölum þar sem reynslan hefur sýnt að aðsókn í athvarfið fer hvorki eftir árstímum né öðrum utanaðkomandi þáttum heldur er tilviljanakennd og óútreiknanleg frá degi til dags. Samtök um kvennaathvarf vara við því að tengja fjölda kvenna í athvarfinu við tíðni heimilisofbeldis. Mun líklegra sé að fjölgun stafi af aukinni umræðu í þjóðfélaginu og þar af leiðandi betri vitneskju kvenna af því úrræði sem Kvennaathvarfið er.