Sex meinatæknar hætta

Sex af sjö meinatæknum sem vinna við blóðrannsóknir á heilsugæslustöðvum á höfuðborgarsvæðinu hætta störfum frá og með morgundeginum, þar sem þeim hefur verið sagt upp. Ástæðan er bréf frá Heilsugæslunni, þar sem þeim er sagt að störf þeirra í núverandi mynd verði lögð niður um mánaðamótin og ítrekað það sem áður hafði verið kunngert, að Heilsugæslan hafi samið við Landspítala háskólasjúkrahús um að annast allar blóðrannsóknir fyrir sig. Meinatæknarnir fengu uppsagnarbréfin boðsend í fyrradag. Þar var þeim jafnframt boðið starf á LSH eða þá að þiggja biðlaun í eitt ár. Sex þeirra munu ætla á biðlaun. Þeir hafa unnið á heilsugæslustöðvunum í Efra - Breiðholti, Árbæ, Mosfellsbæ, tveimur heilsugæslustöðvum í Kópavogi og á Heilsugæslunni við Barónsstíg. Ísleifur Ólafsson yfirlæknir klínískrar lífefnafræðideildar á LSH sagði, að umræddum meinatæknum hefði verið send bréf, þar sem þeim hefði verið tilkynnt að störf þeirra væru felld niður, en þeim jafnframt boðin störf við Landspítalann. "Það skapast ákveðnir, tímabundnir erfiðleikar ef þær kjósa að hætta, en það er unnið að lausn málsins," sagði hann. "Erfiðleikarnir felast í því að ekki verður fólk úti á heilsugæslustöðvunum til þess að taka blóðsýni eins og verið hefur í gegnum tíðina. Það verður hægt að beina sjúklingum annað, þannig að þetta mál ætti að leysast. Svo þarf að endurskipuleggja blóðtökurnar upp á nýtt, því markmiðið er að bæta sýnatökuþjónustuna hjá heilsugæslunni.