Uppsagnir hjá Morgunblaðinu

Á annan tug starsfmanna Morgunblaðsins hafa fengið uppsagnarbréf, samkvæmt upplýsingum Vísis og taka uppsagnirnar gildi frá og með morgundeginum. Ekki fengust upplýsingar um hve mörgum verður sagt upp. Á fjórða hundrað starfsmenn vinna hjá Morgunblaðinu. Samkvæmt upplýsingum Vísis ná uppsagnirnar meðal annars til netmiðils Morgunblaðsins, mbl.is en þar fengu þrír starfsmenn uppsagnarbréf.  Arna Schram, varaformaður Blaðamannafélags Íslands sagði í samtali við Vísi að stjórnendur Morgunblaðsins hefðu upplýst trúnaðarmenn um fyrirhugaðar uppsagnir. Þá sagðist Arna hafa átt fund með Hallgrími Geirssyni, framkvæmdastjóra Árvakurs vegna uppsagnanna en vísaði á stjórnarmenn í Árvakri vegna frekari upplýsinga.