Ræða um samstarf eða sameiningu

Ákveðið hefur verið að hefja viðræður um samstarf eða sameiningu Félags járniðnaðarmanna og Vélstjórafélags Íslands. Þetta kemur fram í fréttatilkynningu frá formönnum félaganna. Markmiðið með því er að sameina alla þá sem starfa við vélstjórn, vélvirkjun, málmiðnað, veiðarfæragerð og í skyldum greinum í eitt öflugt landsfélag. Tveir fulltrúar hafa verið skipaðir frá hvoru félagi og munu þeir fara yfir kosti og galla hugsanlegs samstarfs eða sameiningar og skila áfangaskýrslu til stjórna félaganna eigi síðar en 1. nóvember í haust. Á grundvelli þeirrar skýrslu munu stjórnir félaganna og félagsmenn taka afstöðu til þess hvort sameining eða samstarf geti orðið félagsmönnum þessara félaga til framdráttar. Með þessu er stefnt að því að styrkja atvinnustöðu félagsmanna, efla menntun og símenntun þeirra, bæta lífskjör og félagslegt öryggi ásamt því að veita þeim góða þjónustu í harðnandi heimi á vinnumarkaði. Í dag eru félagsmenn Félags járniðnaðarmanna um 1800 og Vélstjórafélags Íslands um 2200. Sameinaður fjöldi félaga þessara félaga er því um 4000 manns.