Dudek er betri en Kirkland

Mikið hefur verið skrafað um hið mikla markvarðavandamál innan herbúða Liverpool en liðið hefur tapað allnokkrum stigum þennan veturinn á markmannsklúðri, nú síðast hjá Jerzy Dudek gegn Portsmouth. En merkilegt nokk, sé tölfræðin skoðuð kemur í ljós að Pólverjinn er mun betri milli stanganna en Chris Kirkland. Samkvæmt Optastats, sem heldur utan um tölfræði í úrvalsdeildinni, er Dudek meðal þeirra átta bestu séu varin skot skoðuð. Dudek hefur 74 prósenta hlutfall en félagi hans hjá Liverpool, Kirkland, er aðeins með 48 prósent. Dudek hefur þannig aðeins fengið á sig sex mörk í sjö leikjum en Kirkland ein þrettán í tíu leikjum. Sé listinn skoðaður nánar kemur í ljós að besti markvörðurinn það sem af er tímabilinu er Gabor Kiraly hjá Crystal Palace. Hefur hann varið 81 prósent af þeim skotum sem komið hafa á mark Palace í vetur en næstur honum, einnig með 81 prósent en færri skot á sig, kemur markvörður Manchester United, Roy Carroll. Einnig er Jens Lehmann, markvörður Arsenal, neðarlega í hópnum með 62 prósent og er því auðveldara að skilja þá ákvörðun Arsene Wenger að taka hann úr umferð fyrir hinn spænska Manuel Almunia.