Verðugur andstæðingur

ÍS og Keflavík leika til úrslita í Hópbílabikar kvenna í körfuknattleik í dag. Keflavík er taplaust það sem af er í deildinni en ÍS er í öðru sæti þegar sjö umferðir eru búnir. Liðin mættust á heimavelli ÍS í síðasta mánuði og þá hafði Keflavík betur, 64-79. Keflvíkingar unnu bæði deild og bikar í fyrra og er stefnan tekin á alla titla þar á bæ í ár sem og endranær. Í liðinu er að finna valinn leikmann í hverri stöðu og með sigurhefðina sem vopn er liðið illstöðvanlegt. Innan raða ÍS má finna öfluga leikmenn á borð við Öldu Leif Jónsdóttur og Signýju Hermannsdóttur. Með þær í broddi fylkingar hefur liðið náð sér ágætlega á strik í vetur og er í öðru sæti á eftir Keflvíkingum. Sverrir Þór Sverrisson, þjálfari Keflavíkur, sagði í samtali við Fréttablaðið að ÍS væri erfiðasti andstæðingur síns liðs það sem af er vetrar. "Það var reyndar fyrirfram áætlað að það yrðu þrjú lið sem yrðu í baráttunni. ÍS er með gott lið og er verðugur andstæðingur," sagði Sverrir. Sverrir Þór fullyrti að það yrði í mörg horn að líta fyrir Keflvíkinga ef sigur ætti að nást. "Alda Leif og Signý eru aðalleikmennirnir hjá ÍS og það skiptir rosalega miklu máli að ná að stoppa þær. En samt vil ég taka fram að þær eru ekki liðið og ÍS er með aðra leikmenn sem geta dottið í stuð. Við þurfum því að vera einbeitingin uppmáluð í leiknum í dag. Við lékum sterka maður á mann vörn síðast þegar við spiluðum við þær og það gekk eftir. Svona leikir snúast bara um að leika öfluga vörn og það er hún sem fyrst og fremst vinnur svona leiki," sagði Sverrir Þór. Að sögn Signýjar Hermannsdóttur er lið ÍS hvergi bangið við Keflavík þó svo að leikurinn í deildinni gegn þeim hafi tapast. "Við látum hann ekkert á okkur fá og ætlum okkur sigur í leiknum í dag," sagði Signý. "Þær eru með hörkulið og við þurfum að einbeita okkur að því að stoppa hraðaupphlaupin og hægja á þeim. Við erum líka með öflugt lið og við mætum til leiks með það fyrir augum að spila okkar bolta." Leikurinn fer fram í Laugardalshöll kl. 16.