Fórnar Óskarnum fyrir sjónvarp

Kvikmyndagerðamaðurinn Michael Moore segist frekar vilja sýna mynd sína í sjónvarpi fyrir forsetakosningarnar næstu en að bjóða hana fram til Óskarsverðlauna á næsta ári sem bestu heimildarmyndina. Moore, sem vann Óskarinn fyrir heimildarmynd sína Bowling for Columbine, segist kæra sig kollóttan um að slíkt myndi valda því að myndin þætti ekki hæf til tilnefningar og segir að hin raunverulegu Óskarsverðlaun væru ef Bush forseti næði ekki endurkjöri. "Þó svo að ég hafi ekki hugmynd um hvort dreifingaraðilar mynddarinnar vilji leyfa sýningu í sjónvarpi fyrir útgáfu hennar hef ég ákveðið að það skipti mig meira máli að fá myndina sýnda í sjónvarpi fyrir kosningar," segir Moore, "jafnvel þó það verði kvöldið fyrir kosningadag. Þess vegna ætla ég ekki að bjóða hana fram til Óskarsverðlauna. Ef ég get fengið nokkrar milljónir Bandaríkjamanna til þess að horfa á myndina fyrir kosningarnar skiptir það mig meira máli." Moore segir ákvörðun sína um að senda myndina ekki til Óskarsverðlaunanefndarinnar vera vegna þess að hann vildi gefa öðrum heimildamyndagerðarmönnum meiri möguleika á því að vinna. Þá nefndi hann sérstaklega myndina Super Size Me sem líklegan sigurvegara.