Hafnarfjörður nýtur vinsælda

Hafnarfjörður virðist njóta sérstöðu hvað varðar fjölgun íbúa það sem af er þessu ári. Kemur í ljós samkvæmt tölum Hagstofu Íslands að tæplega 300 fleiri fluttu til bæjarins en frá á fyrrihluta ársins. Er það í hróplegu ósamræmi við nágrannabæjarfélagið í Garðabæ en þar fækkaði íbúum um 50. Garðabær er þó ekki eini bærinn á sunnanverðu horninu sem svo er ástatt um. Íbúum á Seltjarnarnesi fækkaði um 40 en annars staðar á höfuðborgarsvæðinu varð lítils háttar fjölgun. Íbúum í höfuðstað Norðurlands, Akureyri, fjölgaði um þrettán talsins en athygli vekur að fækkun varð á Egilsstöðum. Þar fluttu átta fleiri frá bænum en til hans. Hafa ber í huga að eingöngu er um tölur að ræða frá janúar til júní og oft líður einhver tími frá flutningum og þangað til Hagstofu berst tilkynning um það.