Sjaldan jafn margir á embættistöku

Sjaldan hafa jafn margir lagt leið sína á Austurvöll til að fylgjast með embættistöku forseta Íslands eins og í dag. Talið er að um 700 manns hafi verið á staðnum. Fjöldi lögreglumanna var við störf á Austurvelli vegna embættistöku Ólafs Ragnars Grímssonar, forseta Íslands. Að sögn lögreglunnar var reynt að tryggja að öryggisgæsla yrði eins góð og mögulegt væri og var megináhersla lögð á að koma í veg fyrir hluti, sem gætu sett blett á athöfnina. Geir Jón Þórisson, yfirlögregluþjónn, sagði öryggisgæsluna með hefbundnu sniði, og í svipuðum dúr og við þingsetningu. Það hafi komið honum þægilega á óvart hve margir voru viðstaddir athöfnina, eða um 6-700 manns, og væri það meira en hefði sést við svipaðar athafnir í langan tíma.