Skáksambandið berst fyrir Fischer

Íslenska utanríkisráðuneytið hefur rætt við það japanska og komið á framfæri áhyggjum sínum af málefnum skáksnillingsins Bobbys Fischer, sem er í fangelsi í Japan. Skáksamband Íslands skoraði á Bush Bandaríkjaforseta í dag að veita honum sakaruppgjöf.  Allir sem á annað borð voru komnir til vits árið 1972 muna eftir heimsmeistaraeinvíginu þar sem Bobby Fischer sigraði Boris Spasskí. Þar með komst Ísland á heimskortið í skáklistinni. Skáksnillingurinn Fischer situr nú í fangelsi í Japan, þar sem hann var handtekinn á leið til Filippseyja með útrunnið vegabréf. Yfirvöld í Japan hafa enn ekki tekið ákvörðun um hvort hann verði framseldur til Bandaríkjanna. Þar á Fisher yfir höfði sér allt að tíu ára fangelsisvist fyrir að brjóta viðskiptabann við Júgóslavíu með því að tefla þar árið 1992. Hann hefur því ekki getað komið til heimalands síns í tólf ár. Íslenska utanríkisráðuneytið hefur þegar haft samband við það japanska og komið á framfæri áhyggjum sínum að sögn Björns Inga Hrafnssonar, aðstoðarmanns utanríkisráðherra. Það sé þó alveg ljóst að að málið liggi algerlega á forræði Bandaríkjanna. Þá hefur verður haft samband við bandaríska sendiráðið í Tókýó til að sýna hversu mikils Fischer sé metinn hér á landi. Skáksamband Íslands afhenti í dag fulltrúa sendiherra Bandaríkjanna áskorun til George Bush Bandaríkjaforseta um að náða Bobby Fischer. Aðspurð hvenær búist sé við svörum segir Guðfríður L. Grétarsdóttir, forseti Skáksambands Íslands, að ekki sé gott að segja til um það. Hrafn Jökulsson, varaforseti sambandsins, segist vænta þess að áskorunin verði á borði Bandaríkjaforseta í fyrramálið og ákvörðunin liggi fyrir á mánudaginn.   Þær fréttir sem berast af heilsu Fischers eru óljósar en hann er ekki heill á geði og ekki verið síðustu ár. Guðfríður segi hann fyrst og fremst þurfa hjálp. Hann hafi verið mikill skáksnillingur á sínum tíma og það sé harmleikur að nú sé svona komið fyrir honum. Aðspurð finnst Guðfríði koma til greina að veita Fischer pólitískt hæli hér á landi þótt kannski séu ekki allir á sama máli um það. sammála því 06 20