Undramark Pálma Rafns

FH og KA gerðu 2–2 jafntefli í lokaleik fyrri umferðar Landsbankadeildar karla í Kaplakrika í gærkvöldi en bæði liðin komust yfir og jöfnuðu metin í leiknum. Það var að lokum Pálmi Rafn Pálmason sem tryggði KA-mönnum stig með óvæntu skoti af 30 metra færi – sannkölluðu undramarki, því það tók félaga hans nokkra stund að átta sig á því að Pálmi Rafn hefði skorað. „Nei, þetta var engin heppni, boltinn fór nákvæmlega þangað sem hann átti að fara,“ sagði Pálmi Rafn eftir leikinn en hann var langbesti leikmaður KA í leiknum og yfirburðarmaður á vellinum ásamt FH-ingnum Allan  Borgvard sem skoraði eitt marka FH. Eftir daufa byrjun lifnaði heldur betur yfir leiknum í seinni hluta fyrri hálfleiks. Jóhann Þórhallsson kom KA-mönnum yfir með skalla eftir fyrirgjöf Deans Martin en FH-ingar voru búnir að snúa leiknum sér í vil fyrir leikhlé. Fyrst skoraði Atli Viðar Björnsson af stuttu færi og þá Allan Borgvardt eftir laglegt samspil við varamaninn Jónas Grana Garðarsson. Jónas Grani hafði komið inn fyrir Ármann Smára Björnsson skömmu áður en Ármann fékk slæmt höfuðhögg. Síðari hálfleikur var daufur í heildina litið, FH-ingar náðu aldrei sama takti í leik sinn og þeir sýndu í lok fyrri hálfleiks og KA-menn áttu skilið jafntefli. Fylkismenn halda því enn tveggja stiga forskoti á toppnum þrátt fyrir að hafa aðeins náð inn tveimur stigum í síðustu þremur leikjum sínum. Enn eitt tækifæri FH til að komast á toppinn rann þeim því úr greipum í Kaplakrikanum í gær. FH-KA 2-2 0–1 Jóhann Þórhallsson 28. 1–1 Atli Viðar Björnsson 36. 2–1 Allan Borgvardt 44. 2–2 Pálmi Rafn Pálmason 66. Dómarinn Erlendur Eiríksson Slakur Bestur á vellinum Pálmi Rafn Pálmason KA Tölfræðin Skot (á mark)  13–10 (6–6) Horn 6–3 Aukaspyrnur fengnar 18–8 Rangstöður 1–1 Mjög Góðir Allan Borgvardt FH Pálmi Rafn Pálmason KA Góðir Heimir Guðjónsson FH Sverrir Garðarsson FH Jóhann Þórhallsson KA Þorvaldur Guðbjörnsson KA