Hindrun á skipulagsvinnu

Salvör Jónsdóttir, sviðsstjóri skipulags- og byggingarsviðs Reykjavíkurborgar, hefur óskað skýringa á fullyrðingum átakshóps Höfuðborgarsamtakanna og samtaka um betri byggð. Hópurinn er ósáttur við meðferð sem tillögur hópsins varðandi færslu Hringbrautar fengu hjá Reykjavíkurborg. Hefur átakshópurinn meðal annars lýst því yfir að æðstu embættismenn skipulagsmála hjá Reykjavíkurborg telji ekki mögulegt að hefja vinnu við skipulag í Vatnsmýri og á lóð Landspítala vegna ágreinings og pólitískra hagsmuna. "Þetta er fullyrðing sem ég átta mig ekki á og hef því beðið um skýringar," segir Salvör. "Ég verð náttúrlega að vita hvaðan þetta er komið og fá skýringar á ummælunum." Að sögn Salvarar var skipulag Hringbrautar unnið samkvæmt hefðbundnu ferli umferðarskipulags á Íslandi. "Um tillögurnar var fjallað heiðarlega," segir Salvör. "Efnislega er það þannig að við höfum verið að berjast í málefnum Hringbrautarinnar í fimm ár og hitt tugi embættismanna og starfsmanna Reykjavíkurborgar," segir Örn Sigurðsson, talsmaður hópsins. "Við höfum heyrt á mjög mörgum sem starfa fyrir borgina að þeim líður illa við það að þurfa að vinna að lausn sem er í raun baneitruð og beint gegn okkar hagsmunum." Að sögn Arnar er hópurinn ósáttur við þá meðferð sem tillögurnar fengu. "Okkur finnst við vera að leggja eitthvað gagnlegt að mörkum en það er bara reynt að traðka á því," segir Örn. "Átakshópnum hefur verið svarað efnislega lið fyrir lið og málefnalega að mínu mati," segir Steinunn Valdís Óskarsdóttir, formaður skipulagsnefndar Reykjavíkurborgar. "Það er voðalega lítið hægt að gera í því að þau séu ósátt við svörin, sem hafa verið rökstudd efnislega."