Þingfundi lauk með hvelli

Það fór allt í háaloft á Alþingi í dag þegar Halldór Blöndal sleit þingi þrátt fyrir hávær mótmæli stjórnarandstöðu sem vildi halda fundinum áfram. Stjórnarandstaðan gerði harða hríð að ríkisstjórninni, á stuttum þingfundi sem hófst klukkan þrjú, í dag, og lauk klukkan hálf fjögur. Stjórnarandstöðuþingmenn helltu úr skálum reiði sinnar yfir ríkisstjórnina fyrir að afturkalla hið umdeilda fjölmiðlafrumvarp, og leggja það svo fram aftur, með smávægilegum breytingum. Var því meðal annars haldið fram að ríkisstjórnin þyrði ekki að leggja málið í dóm þjóðarinnar. Davíð Oddsson, forsætisráðherra, vísaði þessum ásökunum á bug, og sagði að rétt og vel hefði verið staðið að þessu máli. Umræða um nýja fjölmiðlafrumvarpið, sem og frumvarp stjórnarandstöðunnar um framkvæmd þjóðaratkvæðagreiðslu, verður væntanlega á miðvikudag. Klukkan um hálf fjögur þegar all margir stjórnarandstöðuþingmenn höfðu tjáð sig um þetta nýja útspil ríkisstjórnarinnar sagði Halldór Blöndal að fleiri mál væru ekki á dagskrá. Stjórnarandstaðan krafðist þess hins vegar að fá að ræða fundarstjórn forseta. Steingrímur J. Sigfússon taldi sig eiga rétt á því. Halldór sleit fundinum engu að síður og urðu þá hávær mótmælaköll frá stjórnarandstöðunni.