Ríkisarfarnir vildu á Grundartanga

Krónprins og krónprinsessa Noregs gerðu víðreist um Suðurland í dag og heimsóttu meðal annars landa sína í Járnblendiverksmiðjunni á Grundartanga. Prinsinn og prinsessan óskuðu sérstaklega eftir því að heimsækja járnblendiverksmiðjuna og er ástæðan eflaust sú að verksmiðjan er nú alfarið í eigu Norðmanna. Dagurinn hjá þeim Hákoni og Mette Marit hófst með heimsókn í Þjóðmenningarhúsið. Þar hittu þau Ólaf Ragnar Grímsson, forseta Íslands, og frú Dorrit Moussaief sem voru leiðsögumenn norsku gestanna í dag. Frá Þjóðmenningarhúsinu var haldið að Nesjavallavirkjun og þaðan til Þingvalla þar sem gengið var niður Almannagjá og þau Hákon og Mette Marit frædd um sögu staðarins. Krónprinsinn var hrifinn af Þingvöllum og sagði hann það áhrifamikið að ganga þar um. Á Grundartanga var gestunum vel fagnað og tvær yngismeyjar færðu þeim Mette Marit og Dorrit Mousaieff blómvendi. Verksmiðjan er, sem fyrr segir, alfarið í eigu Norðmanna en flestir starfsmenn eru að vísu íslenskir. Þeir Norðmenn sem voru að vinna í dag vinna voru ákaflega glaðir yfir að fá krónprins sinn og krónprinsessu í heimsókn. Frá Grundartanga lá leið gestanna að Reykholti þar sem Þorgerður Katrín Gunnarsdóttir menntamálaráðherra verður gestgjafi þeirra í kvöldverði í kvöld.