Kæran sú fyrsta sinnar tegundar

"Maðurinn telur að hann hafi verið blekktur til að láta af hendi peninga," segir Jón H. Snorrason, yfirmaður efnahagsbrotadeildar ríkislögreglustjóra, en Sigvaldi Gunnlaugsson kærði nokkra menn til ríkislögreglustjóra fyrir svik sem upphófust með tölvupósti frá Nígeríumanni að nafni Abiola Williams. Sigvaldi tapaði um fjórum milljónum króna vegna svikanna. Jón segir kæru Sigvalda vera þá fyrstu sinnar tegundar sem hafi komið inn á borð hjá ríkislögreglustjóra. Svipuð dæmi hafi komið upp hér og þar í heiminum og embætti ríkislögreglustjóra hafi fengið ábendingar um án þess að kæra hafi verið lögð fram. Hann segir rannsóknina til að byrja með beinast að gagnasöfnum þar sem verða fundnir fastir punktar til að byggja á. "Við þurfum að átta okkur á með hvaða hætti við getum gefið lögregluyfirvöldum í öðrum löndum upplýsingar sem að með samstilltu átaki margra gætu orðið til að hafa hendur í hári þessara manna." Jón segir fjársvikamenn sem þessa vera hugmyndaríkja svindlara sem þrói aðferðir sem virðast trúlegar og húkka fólk þannig á krókinn. Helst snúast aðferðirnar um að gefa fólki von um mikinn hagnað en í upphafi þurfi það að láta pening af hendi rakna af ýmsum misunandi ástæðum.