Íslendingar dagsins í dag

Ljósmyndabókin Íslendingar kom út í dag og á sama tíma var opnuð sýning af völdum myndum úr bókinni. Myndefnið er Íslendingar dagsins í dag. Sýningin hefur verið sett upp á Austurvelli og hún er framlag til að skilja hvar Íslendingar eru staddir nú í upphafi 21. aldar. Þar eru einnig myndir sem prýða bók Sigurgeirs Sigurjónssonar ljósmyndara og Unnar Jökulsdóttur ritöfundar. Í tvö ár ferðuðust þau um landið og heimsóttu fólk í öllum landshlutum, fundu spennandi fólk sem skemmtilegt var að mynda og tala við. Unnur segir að þeim hafi hvarvetna verið tekið dásamlega vel. Hvort sem það voru trillukarlar, þúsundþjalasmiðir, ferðabændur, refaskyttur, tamningamenn eða náttúrubörn. Unnur segist hafa haft mjög gaman að einbúunum, til dæmis Jóni Haraldssyni í Gautsdal og Bjössa á Ósi en annars væri allt í uppáhaldi hjá henni og erfitt að gera upp á milli. Bókin kemur út á ensku og íslensku og hún er væntanleg á þýsku og frönsku síðar í sumar. Sýningin á Austurvelli stendur til 1. september.