Grjótkast í Borgartúni

Byggingafulltrúi Reykjavíkurborgar átti fótum fjör að launa þegar sprengt var fyrir grunni í Borgartúni. Svo virðist sem eitthvað hafi farið úrskeiðis við framkvæmdina því skæðadrífa grjóts kastaðist yfir byggingar og bifreiðar í nágrenninu. Verið er að taka grunn fyrir miklum stórhýsum á lóð við Borgartún þar sem ætlunin er meðal annars að hafa 2ja hæða niðurgrafið bílastæðastæðahús. Undirverktaki fyrirtækisins Eyktar hófst handa við að sprengja fyrir grunninum á laugardag, en gegnt byggingasvæðinu eru skrifstofur Skipulags- og byggingarsviðs Reykjavíkurborgar til húsa. Magnús Sædal Svavarsson byggingafulltrúi Reykjavíkurborgar segist hafa verið áhorfandi að atburðinum. Hann segir að þegar skotið reið haf hafi grjóti og mulningi ringt yfir allt svæðið. Hann varð að stökkva frá glugganum og taldi víst að allar rúður hefðu brotnað. Hins vegar brotnaði ekki nema ein rúða á fjórðu hæð. Byggingafulltrúinn segir slíkt ekki eiga að koma fyrir. Yfirverkfræðingur borgarinnar hafi málið til athugunar því ljóst sé að þarna hafi eitthvað farið úrskeiðis. Magnús segist hafa brugðið nokkuð við að sjá hve mikið grjót var á ferðinni. Þó gefið hafi verið viðvörunarmerki var nokkur umferð á götunni sem stoppaði ekki