Nýtt hjarta í annað sinn

Helgi Harðarson, þrjátíu og eins árs Grindvíkingur, er nú á skurðarborðinu á Salhgrenska sjúkrahúsinu í Gautaborg og er að fá nýtt hjarta - í annað sinn á ævinni. Helgi var annar Íslendingurinn til að fá grætt í sig nýtt hjarta en hann gekkst undir sína fyrstu hjartaaðgerð árið 1989 á Brombton sjúkrahúsinu í Lundúnum. Hann veiktist fimmtán ára gamall af flensu og fékk upp úr þeim veikindum illkynjaðan vírus í hjartað sem olli því að það tók að stækka. Honum var ekki hugað líf nema hann gengist undir hjartaígræðslu. Eftir ígræðsluna, árið 1999, kom leki að hjartaloku sem olli því að hjartað tók aftur að stækka og nú er svo komið að Helgi þarf að fá hjarta öðru sinni enda hefur heilsu hans hrakað jafnt og þétt síðustu árin. Í þessari atrennu á einnig að græða nýtt nýra í Helga enda hefur hjartaígræðslan valdið miklu álagi á nýru hans en nýrun vilja skemmast vegna mikils álags hjá hjartaþegum. Eftir aðgerðina verður Helgi því með þrjú nýru. Þetta er í þriðja skiptið sem Helgi býr sig undir hjartaígræðsluna. Í eitt skipti var hann stöðvaður áður en hann fór úr landi en í hitt skiptið var hann nánast kominn á skurðarborðið þegar í ljós kom að hjartað hentaði ekki. Helgi Harðason var bjartsýnn fyrir aðgerðina og bað fyrir kærar kveðjur heim.