Fjölmargir lýstu andstöðu sinni

Enginn úr ráðherrasveit eða landstjórn Framsóknarflokksins kom á fjölmennnan fund Framsóknarfélagsins í Reykjavíkurkjördæmi suður, þar sem fjölmiðlafrumvarpið nýja var til umræðu. Fjölmargir félagsmenn lýstu yfir andstöðu við aðgerðir stjórnarflokkanna í málinu og sögðu forystusveit Framsóknarflokksins ekki samstíga almennum flokksmönnum. Eiríkur Tómasson lagaprófessor reifaði sjónarmið sín á fundinum, þar kom fram að hann teldi eðlilegast við núverandi aðstæður að það færi fram þjóðaratvkæðagreiðsla um lögin þótt með fyrirvara væri hægt fella lögin úr gildi ef við það yrði látið sitja. Að loknu erindinu voru fjörugar umræður þar sem félagsmenn gagnrýndu forystu flokksins fyrir að vera ekki samstíga flokksmönnum sínum. Jónína Bjartmarz varaformaður allsherjarnefndar var sú eina úr þingliði Framsóknarflokksins sem mætti á staðinn. Athygli vakti að hún tiltók sérstaklega að úti í samfélaginu væru jafnvel fleiri sem teldu ekki efni til að ríkisstjórnin hefði gripið inn í ferlið, það yrði að vera þjóðaratkvæðagreiðsla. Hún sagðist telja að það ætti að leita þeirra lögskýringa til lausna á þeim spurningum sem kæmu upp um stjórnskipun sem tryggðu frið og sátt í samfélaginu. Hún sagði að ef menn gætu náð saman um það að fella lögin úr gildi án þess að setja ný lög gæti hugsanlega náðst sátt. Hún sagðist sem Framsóknarkona fyrst og fremst vera talsmaður sátta en sagðist ekki vera að gefa út yfirlýsingu um hver afstaða hennar yrði þegar upp væri staðið. Ágrip af umræðum er að finna í hljóðtengli sem fylgir fréttinni.