Hinir vísu menn funda

Sex manna hópur sérfræðinga kom í gær fyrir nefnd "hinna vísu manna" sem undirbýr þjóðaratkvæðagreiðsluna vegna fjölmiðlalaganna. Megináherslan er lögð á að svara þeirri spurningu hvort eðlilegt sé að setja skilyrði um þátttökufjölda í atkvæðagreiðslunni. Hæstaréttarlögmennirnir fjórir sem skipa nefnd til að undirbúa lagasetningu vegna þjóðaratkvæðagreiðslunnar, hafa fundað stíft að undanförnu. Þeir stefna að því ljúka starfi sínu rétt fyrir næstu mánaðamót, eða nokkrum dögum áður en þing kemur saman 5. júlí til að ákveða fyrirkomulag atkvæðagreiðslunnar, en stefnt er að kjördegi í byrjun ágústs. Karl Axelsson, formaður nefndarinnar, sagði í samtali við fréttastofu að sex séfræðingar hefðu komið fyrir nefndina í gær, Gunnar Helgi Kristinsson, prófessor í stjórnmálafræði, Þorlákur Karlsson, sérfræðingur hjá Gallup, Friðrik Jónsson, forstöðumaður félagsvísindastofnunar Háskóla Íslands, Páll Hreinsson og Björg Thorarensen, prófessorar við lagadeild Háskóla Íslands og Sigurður Líndal prófessor og sérfræðingur í stjórnskipunarrétti. Sérfræðingarnir voru meðal annars spurðir um fyrirkomulag, framkvæmd og tímasetningu þjóðaratkvæðagreiðslunnar, en ekki liggur fyrir hvort fleiri verði kallaðir á fund nefndarinnar.