Bréfum ekki svarað

Þjóðhátíðarnefnd Reykjavíkur sendi forsætisráðuneytinu tvö bréf þar sem óskað var eftir samstarfi um 17. júní hátíðarhöld. Engin svör bárust og segir ráðuneytisstjórinn að erindið hafi dottið upp fyrir sökum tímaskorts. Formaður Þjóðhátíðarnefndar segir skýringarnar langsóttar og ætlar að hafa samband við næsta forsætisráðherra vegna frekara samstarfs í framtíðinni. Þjóðhátíðarnefnd Reykjavíkurborgar hafði áhuga á að fá ríkið til samstarfs vegna 100 ára afmælis heimastjórnarinnar. í byrjun desember í fyrra var sent bréf þar sem óskað var eftir samstarfi við afmælisnefndina sem var undir forsæti Júlíusar Hafstein. Anna Kristinsdóttir, formaður þjóðhátíðarnefndar, sagði þau í fyrstu hafa verið vongóð og hafi beðið í rúman mánuð áður en þau sendu annað bréf. Eftir það höfðu þau samband við Júlíus sem kom á fund og tilkynnti að nefndin ætti von á bréfi innan skamms. Það hafi aldrei borist. Fréttastofa hefur án árangurs reynt að ná tali af Ólafi Davíðssyni, ráðuneytisstjóra forsætisráðuneytisins. Haft var eftir honum í fréttum Ríkisútvarpsins að erindinu hafi ekki verið svarað þar sem tíminn hafi hlaupið frá mönnum. Önnu þykja það langsóttar skýringar og segir að hátíðahöldin á fimmtudag hefðu verið gott tækifæri til að kynna heimastjórnarafmælið fyrir almenningi. Þetta tómlæti ráðuneytisins verði þó ekki til að draga út hátíðleikanum á 17. júní. Anna ætlar að óska eftir eftir samstarfi ríkis og borgar í framtíðinni og hyggst senda bréf þess efnis í forsætisráðuneytið eftir 15. september.