Draumur verður að veruleika

Fyrsta plata dúettsins Braks kom út á dögunum og kallast hún Silfurkoss. Lögin, sem eru tólf talsins, eru eftir þá félaga Harald Gunnlaugsson og Hafþór Ragnarsson. Allir textar eru á íslensku. Að sögn Haraldar hafa þeir verið lengi að þó að sveitin sjálf hafi aðeins verið til í nokkur ár. Hafþór var áður í hljómsveitinni Sonum Raspútins en Haraldur hefur meira einbeitt sér að sveitaballabransanum. "Þetta er draumur sem er að verða að veruleika hjá okkur," segir Haraldur. "Við höfum spilað tónlist í 10 til 15 ár og það var kominn tími á þetta." Haraldur bætir við að vinnsla plötunnar hafi verið strembin, enda tók hún tvö ár. "Maður vill vanda sig við fyrstu plötuna. Við gerðum allt sjálfir en fengum þó hljóðfæraleikara til að aðstoða okkur," segir hann. Á meðal þeirra eru bassaleikari Jagúar, Ingi S. Skúlason, og sveiflukóngurinn sjálfur Geirmundur Valtýsson sem grípur í nikkuna í einu lagi. "Það var algjör snilld að vinna með Geirmundi. Hann er frábær í samstarfi og frábær harmonikkuleikari." Tónlist Braks hefur verið lýst sem vönduðu popprokki með breskum áhrifum. Nú þegar hefur titillag plötunnar, Silfurkoss, ómað nokkuð títt á Rás tvö og svo er á næstunni væntanlegt myndband við lagið Álfar. Útgáfutónleikar eru fyrirhugaðir síðar í vetur en þeim sem vilja kynnast sveitinni nánar er bent á heimasíðuna, brak.tv.