Klinsmann tekur við Þýskalandi

Allar líkur eru nú taldar á því að Jurgen Klinsmann taki við þjálfun þýska landsliðsins í knattspyrnu. Viðræður eru vel á veg komnar og samkvæmt þýska knattspyrnusambandinu hefur Klinsmann samþykkt tilboð þeirra og aðeins eigi eftir að skrifa undir. "Það er mikill heiður að fá tækifæri til að hjálpa landsliðinu fyrir HM 2006 í Þýskalandi," sagði í yfirlýsingu frá Klinsmann í gær. Þar með er lokið örvæntangarfullri leit Þjóðverja að eftirmanni Rudis Völlers sem sagði starfi sínu lausu eftir EM í Portúgal. Margir hafa verið nefndir til sögunnar en allir sem þýska knattspyrnusambandið ræddi við höfnuðu starfanum, þar á meðal þeir Otto Rehhagel og Ottmar Hitzfeld. Jurgen Klinsmann vakti nokkra athygli nýverið þegar hann lýsti því yfir að Þjóðverjar ættu að íhuga þann möguleika að ráða erlendan þjálfara en það þótti álíka líklegt og að í helvíti myndi frjósa. Ummælin virðast á hinn bóginn hafa varpað kastljósinu á Klinsmann sem mögulegum arftaka Völlers. Líklegt er talið að Klinsmann muni hafa sér til aðstoðar tvo menn og hafa þeir Oliver Bierhoff, fyrrverandi landsliðsmaður, og Holger Osieck, fyrrum aðstoðarlandsliðsþjálfari þýska landsliðsins, verið nefndir helstir til sögunnar. Klinsmann, sem er 39 ára, er með þjálfarapróf en hefur enga reynslu af þjálfun. Hann yrði ekki fyrsti leikmaðurinn sem reynslulaus tæki að sér þjálfun hjá stórri knattspyrnuþjóð. Til að mynda var Michel Platini í þessum sporum þegar hann tók við franska landsliðinu og það sama má segja um Rudi Völler.