Bragi hlýtur Jules Verne verðlaun

Alþjóðleg samtök um vetnisorku, International association for hydrogen energy (IAHE), veittu nýlega Braga Árnasyni prófessor hin eftirsóttu Jules Verne verðlaun. Bragi veitti verðlaunum viðtöku á heimsráðstefnu um vetnisorku sem fram fór í Yokohama í Japan 30. júní síðastliðinn. Hlaut hann þau fyrir að hafa með samstarfi háskóla, stjórnvalda og atvinnulífs unnið að því að gera Ísland að fyrsta landi veraldar er byggir á vetnishagkerfi árið 2030. Í hinu alþjóðlega vísindasamfélagi er Háskóli Íslands talinn leiðandi á sviði rannsókna og hagnýtingar vetnisorku, og er það ekki síst fyrir einstakt frumherjastarf Braga Árnasonar. Margar af fremstu sjónvarpsstöðum heims hafa komið til landsins undanfarið til að vinna þætti um það sem helst er að gerast á þessum vettvangi.