Banaslys í Skutulsfirði

Níu ára stúlka beið bana þegar hún hrapaði í fjallinu Kubbanum ofan Holtahverfis á Ísafirði á þriðja tímanum í dag. Fjallið Kubbi er í botni Skutulsfjarðar og gnæfir yfir byggðinni í botni fjarðarins. Stúlkan, sem var til heimilis á höfuðborgarsvæðinu og gestkomandi á Ísafirði, hafði ásamt frænda sínum á sama aldri farið í göngu upp í hlíðar fjallsins. Ofarlega í fjallinu virðist henni hafa skrikað fótur. Drengurinn var með GSM-síma og lét vita af slysinu. Lögregla og björgunarsveitir ásamt lækni héldu þegar á vettvang en þegar að var komið var stúlkan látin. Í tilkynningu frá lögreglunni á Ísafirði segir að aðstæður þarna séu mjög varasamar, mjög brött fjallshlíð með lausu grjóti og klettar þar yfir sem séu hættulegir yfirferðar.