Keflvíkingar töpuðu

Á meðan Keflvíkingar vinna hvern leikinn eftir annan í Evrópukeppninni í körfubolta gengur verr í Intersportdeildinni. Sameiginlegt lið Hamars og Selfoss lagði Keflavík að vígi í 8. umferðinni í gærkvöldi, 92-86. Það dugði Keflvíkingum ekki að Antony Glover skoraði 39 stig, þeir töpuðu samt. Hinn Bandaríkjamaðurinn í liði Keflvíkinga, Nick Bradford skoraði 23 stig en félagar þeirra samtals 24. Damon Baily skoraði flest stig Hamars/Selfoss, 32. Njarðvík var nálægt því að tapa öðrum leik sínum á leiktíðinni. Mótherjar þeirra í Fjölni höfðu forystu allt þar til skammt var til leiksloka að Njarðvík sigldi framúr, úrslitin 98-88. Matt Sayman með 26 stig og Friðrik Stefánsson með 23 voru stigahæstir í liði Njarðvíkur. Sayman tók auk þess 12 fráköst og átti 11 stoðsendingar. Nemanja Sovic skoraði 27 stig fyrir Fjölni og Darrel Flake 26 en hann tók auk þess 16 fráköst. Snæfell sigraði ÍR með 104 stigum gegn 88. Pierre Green skoraði 31 stig fyrir Snæfell, Sigurður Þorvaldsson 23 og Hlynur Bæringsson 22 auk þess sem hann tók 13 fráköst. Theo Dixon var atkvæðamestur hjá ÍR, skoraði 24 stig. Skallagrímur vann öruggan sigur á Tindastóli, 105-72. Clifton Cook skoraði 27 stig og Jovan Zdravevski 26 fyrir Borgnesinga en Ron Robinson var stigahæstur Sauðkrækinga með 23 stig. KR átti ekki í miklum vandræðum með að leggja KFÍ að velli, úrslitin 92-67. Cameron Echols skoraði 22 stig fyrir KR og Josuha Helm 29 fyrir KFÍ. 8. umferð lýkur í kvöld, Grindavík mætir Haukum klukkan 19,15. Grindvíkingar tefla fram nýjum leikmanni, Terry Taylor en hann kemur í stað Justin Miller sem farinn er til síns heima eftir 7 leiki með Grindvíkingum. Njarðvík er í fyrsta sæti deildarinnar með 14 stig, tveimur meira en Snæfell sem er í öðru sæti. Sigurganga Keflvíkinga í 1. deild kvenna hélt áfram í gærkvöldi. Keflavík vann stórsigur á Haukum, 97-63. Birna Valgarðsdóttir var stigahæst í Keflavíkurliðinu með 25 stig en þetta var sjöundi sigurleikur Suðurnesjastúlkna í röð. Helena Sverrisdóttir var sem fyrr atkvæðamest í Haukaliðinu með 22 stig.