Póstpokinn lenti í fjörunni

Svo virðist sem líki Sri Ramawati hafi verið varpað af klettum ofan í fjöru áður en flæddi að. Björgunarsveitir settu út rekald í dag, til að líkja eftir reki líksins í sjónum, og lögðu sig í framkróka við að fylgja lýsingum Hákonar Eydals sem hefur viðurkennt að hafa myrt Sri. Veður og sjávarföll á Kjalarnesi í dag líktust þeim aðstæðum sem voru fjórða júlí, þegar Hákon losaði sig við líkið af Sri, eftir að hafa orðið henni að bana í átökum á heimili sínu í Stórholti. Aðstæður voru mun líkari í dag en fyrir nokkrum dögum þegar fresta þurfti aðgerðinni vegna veðurs. Björgunarsveitarmenn endursköpuðu aðstæðurnar eftir nákvæmum upplýsingum sem Hákon hefur gefið lögreglunni. Sri var meðal annars klædd í leðurjakka og var bundið fyrir sænska póstpokann með buxum. Í pokann var sett sams konar kúbein og Hákon banaði Sri með. Hákon segist hafa kastað líkinu í sjóinn milli klukkan tvö og hálf þrjú eftir hádegið. Hann er 185 cm á hæð og 85 kiló að þyngd. Pokinn sem kastað var út í dag vó 50-60 kíló en talið er ólíklegt að Hákon hafi getað lyft meiru en sjötíu kílóum, enda þurfti tvo björgunarmenn til að koma pokanum fram af klettinum í dag. Hæðin niður var fjórir metrar en það sem kom björgunarsveitamönnum verulega á óvart var að pokinn lenti á þurru og fimm metrar voru í sjóinn. Ákveðið var að draga pokann ekki út í sjó þar sem Hákon hefði ekki gert það á sínum tíma. Einum og hálfum tíma eftir að pokanum var kastað var sjór kominn að honum. Til að komast að Hofsvík á Kjalarnesi þarf að aka í gegnum tréhlið og stutt er í næstu hús. Nágrannar sem Stöð 2 ræddi við í dag sögðu lögreglu ekki hafa rætt við sig um sunnudagseftirmiðdaginn sem Hákon var á ferð á jeppa sínum. Einn íbúi á svæðinu segir nágranna sinn eiga svipaðan jeppa og hann hefði farið um þetta leyti að veiða með börnum sínum við Hofsvík. Fólkinu hrýs hugur við ef börn að leik hefðu orðið vör við líkið.