Fullar fangageymslur í Eyjum

Fangageymslur lögreglunnar í Vestmannaeyjum eru fullar eftir síðasta kvöld Þjóðhátíðar í gærkvöldi. Lögreglan segir mikið hafa verið um ölvun og einnig að nokkur fíkniefnamál hafi komið upp, en þau nálgast nú fimmta tuginn sem er meira en áður hefur þekkst. Veður var milt og gott í gærkvöldi en örfáir rigningadropar féllu í Herjólfsdal skömmu eftir miðnætti eftir að Árni Johnsen hafði klárað brekkusönginn. Árni, sem var fjarri góðu gamni í fyrra, var í góðu formi og spilaði nokkrar mínútur framyfir miðnætti. Hljómsveitirnar Á móti sól og Land og synir skemmtu í Eyjum í gær ásamt Idol-stjörnunni Kalla Bjarna. Byrjað var að fljúga frá Eyjum klukkan átta í morgun og eru tólf vélar á áætlun í dag. Starfsmaður Flugfélags Íslands kvartar þó undan því að sætanýting sé ekki með besta móti þar sem sumir farþega séu enn við skemmtanahald í Dalnum.