Reyna að jarða Arafat lifandi

"Þeir eru að reyna að grafa Abu Ammar lifandi," sagði Suha Arafat, eiginkona Jasser Arafats, forseta palestínsku heimastjórnarinnar, þegar hún réðist harkalega gegn næstráðendum hans í viðtali við Al-Jazeera sjónvarpsstöðina. Abu Ammar er gælunafn Jasser Arafats. Orð sín lét Suha falla eftir að nokkrir helstu forystumenn Palestínumanna greindu frá því að þeir ætluðu að heimsækja Arafat á sjúkrahúsinu þar sem hann dvelur í Frakklandi. Suha brást ókvæða við því og sakaði þá um samsæri. Ahmed Qureia forsætisráðherra, Mahmoud Abbas forveri hans, Nabil Shaath utanríkisráðherra og Rauhi Fattouh þingforseti héldu þó allir áleiðis til Frakklands í gær. Upphaflega stóð til að þeir kæmu til Parísar í gær en vegna orða Suha Arafat frestaðist för þeirra og koma þeir þangað í dag. Suha, sem ekki hafði séð Jasser í þrjú ár þegar hann var fluttur veikur til Parísar, sagði að hann myndi snúa aftur til Palestínu en sakaði samstarfsmenn hans um að reyna að sölsa völd hans undir sig.