Kveikt í klæðningu

Slökkvilið Hafnarfjarðar hefur nú slökkt eld sem kom upp í klæðningu verslunarmiðstöðvarinnar Fjarðarins í miðbæ Hafnarfjarðar fyrir stundu. Allt tiltækt slökkvilið bæjarins fór á staðinn en fjöldi fyrirtækja er í húsinu. Mikinn reyk lagði frá verslunarmiðstöðinni Firðinum í Hafnarfirði rétt fyrir klukkan níu í gærkvöld. Nokkur hundruð manns voru á svæðinu þar sem skemmtanahald stóð yfir austan við verslunarmiðstöðina. Talið er að krakkar hafi kveikt í steinull og tjörupappa þar sem klæðningin á húsinu var brotin en málið er í rannsókn hjá lögreglu. Jón Helgi Guðmundsson, stöðvarstjóri slökkviliðs höfuðborgarsvæðisins, segir slökkvistarf hafa tekið um 40 mínútur. "Mikið rauk úr þar sem logaði í tjörupappa og ull en þetta var staðbundið og fljótlegt að komast fyrir þetta." Skemmdir urðu ekki miklar. Loka þurfti verslun 10-11 í Firðinum vegna brunans en hún var opnuð aftur skömmu síðar.  Jón Helgi segir að lítill reykur hafi borist inn í húsið. Lögreglan girti svæði aftan við verslunamiðstöðina af en það hafði ekki áhrif á skemmtanahaldið.