Erum ekki kynþáttahatarar

Biskup áminnti þjóðina um að sýna umburðarlyndi í hátíðarguðþjónustu í Dómkirkjunni í dag. Í ræðu sinni lagði hann út af forsíðu blaðins Reykjavík Grapevine, en hana prýðir þeldökk kona íklædd þjóðbúningi Íslendinga. Eins og fram hefur komið í fréttum stöðvar 2 var það ekki heiglum hent að fá hátíðarbúning á konuna sem prýðir forsíðuna að láni. Þegar blaðið lýsti hugmyndum sínum um notkun búningsins fyrir umsjónarkonu búningaleigu Þjóðdansafélags Reykjavíkur lét hún í ljós að henni þætti hugsanlegt að vegið væri að heiðri búningsins og notkunin væri vart viðeigandi. Þetta staðfestir stjórn Þjóðdansafélagsins. Bendt Petersen, formaður félagsins segist harma þá umræðu sem upp er komin og hefur áhuggjur af framtíð félagsins. Hann segir að félaginu hafi borist fjöldi bréfa þar sem þau séu kölluð kynþáttahatarar og ýmsum ókvæðisorðum. Í fréttatilkynningu frá Þjóðsdansafélagi Reykjavíkur vegna málsins segir meðal annars að félagsmenn hafi lengst af mátt sitja undir því að vera bæði púkó og hallærisleg og þau beiðist nú undan því að að vera stimpluð sem kynþáttahatarar. Bendt sagði að félagið hefði ekki neitað blaðinu um búninginn heldur hefðu þau dregið hugmyndina í efa. Þau hefðu reynslu af því að búningar hefðu verið misnotaðir. Þegar hann var spurður nánar út í ástæður félagsins sleit hann viðtalinu. Hann dansaði þjóðdansa á Árbæjarsafni í dag. Þeir sem klæddust þjóðbúningum þurftu engan aðgangseyri að greiða og fólk af erlendum uppruna var hvatt til að mæta í þjóðbúningi síns heimalands.