Grænfriðungar til Ísafjarðar

Grænfriðungar hyggjast gera strandhögg á Ísafirði á morgun en þá leggst að bryggju Esperanza sem er nýjasta skip samtakanna. Er þetta fyrsta stopp skipsins hér á landi en hugmyndin er að farið verði hringinn kringum landið eins og gert var á síðasta ári til að kynna málstað samtakanna. Verður lögð áhersla á hvalaverndun, mengun í hafinu og loftslagsbreytingar. Tæp 58 þúsund aðilar hafa nú skrifað undir yfirlýsingu samtakanna þar sem lýst er yfir vilja til að ferðast hingað til lands hætti stjórnvöld hvalveiðum með öllu.