Dagný: Vona að Þýskaland vinni ekki HM

Landsliðskonan Dagný Brynjarsdóttir fylgist með HM kvenna í fótbolta sem fer fram þessa dagana í Kanada en fullt af fyrrverandi liðsfélögum hennar eru að spila á mótinu, þar á meðal nokkrar með þýska landsliðinu sem vann 4-1 sigur á Svíum í sextán liða úrslitunum um síðustu helgi.

„Það eru fjórar stelpur sem spila með þýska landsliðinu sem voru með mér í Bayern München. Það er gaman að fylgjast með þeim. Það er auðvitað erfitt að horfa á liðsfélaga sína og vera ekki þarna sjálfur. Maður er að horfa kannski á leikmenn og ég veit að ég er betri en þær. Þær fá að vera þarna en ekki maður sjálfur,“ segir Dagný sem dreymir um að spila með Íslandi á HM.

„Miðað við minn aldur þá gæti ég kannski náð tveimur heimsmeistarakeppnum úr þessu og ég er að vonast til að ná allavega einu. Það er draumurinn. Það er mjög erfitt að sjá þessa leikmenn þarna sem maður er búinn að spila með og á móti. Ég veit að ég er ekki síðri. Við vinnum Holland í apríl og svo komast þær í sextán liða úrslit. Það er alveg nett pirrandi,“ segir Dagný en hollenska liðið tapaði fyrir heimsmeisturum Japans í sextán liða úrslitum. En hver verður heimsmeistari í ár?

„Ég vona að Þýskalandi vinni þetta ekki. Þessar þýsku eru svo mikið: Við erum bestar, kunnum allt best og getum allt best. Ég er að vonast til að einhver slái þær út,“ segir Dagný og horfir sérstaklega til bandaríska landsliðsins sem hefur þó ekki unnið HM kvenna í sextán ár.

„Ég vona að Bandaríkin slái þær þýsku út en þessi lið geta mæst í undanúrslitunum. Bandaríska liðið er samt ekki búið að vera sannfærandi á mótinu til þessa. Bandaríska liðið þarf að fara að spila betur ef það ætlar að gera eitthvað,“ segir Dagný og það er alveg á hreinu með hverjum hún heldur.

„Ég held með Bandaríkjunum í þessu móti enda svolítill Kani í mér,“ segir Dagný létt að lokum. Átta liða úrslit HM hefjast í kvöld með leik Þýskalands og Frakklands klukkan 20.00 og Kína og Bandaríkin mætast síðan klukkan 23.30. Seinni tveir leikirnir (Ástralía-Japan og England-Kanada) fara síðan fram á morgun.